MNF Publicity Board chuan vawiin khan Aizawl Press Club-ah chanchinbu mite an kawm a. 

An Vice Chairman J. Malsawmzuala Vanchhawng chuan, ZPM sorkar council of ministers  december ni 14, 2023 a thukhawm chuan midang kuta Lengpui Airport hlan dan dap hi a rel tawh a. Hemi zirchiang tura din Working Committee in tunhnaia Chief Minister hnena rawtna an thlenah Air Force kuta hlan rawtna hi a lo lang ta a ni, a ti.

“Sorkar lo awm tawhten harsatna tam tak paltlanga an lo din leh harsa taka an lo tih changtlun chhoh, Mizoram tana ro tling (Asset) pawimawh tak thehthang a tum dan hi mipuite pawisawina nasa tak a nih dawn avangin MNF chuan a pawmpui thei lo a, a tawp thlenga dodal a tum a ni” a ti.

 

MNF General Secretary nibawk chuan, Indian Air Force ten Lengpui Airport an hman dan tur leh Mizoram miputen kan mamawh dan hi thil inpersan hlauh a ni a. Indian Air Force chuan venhimna (Security) lam an ngaihpawimawh ber laiin, Mizoram mipuite tan chuan thlawhna hmanga zin veivahna (Connectivity) kan neih chhun anih avangin Indian Air Force kuta hlan anih rualin Mizoram mipuiten harsatna nasa tak kan tawk nghal dawn, a ti a.

Hmun danga Civil Airport anga hman, Indian Air Force thuhnuaia awmte ang bawkin than zel chu sawi loh, thlawhna service awm mekte pawh a tlem zel ang a, a tuartu chu Mizoram mipuite kan ni dawn a. Kum 1944 atanga hman tawh Silchar Airport than loh dante, Jorhat leh Tezpur Airport dinhmunte enin hei hi a chiang em em a. Heng Airport upa tawh tak takte ai hian kum 1998 December thla atanga kan hman tan Lengpui Airport-ah hian thlawhna lut leh chhuak leh passenger te kan ngah tawh zawk em em a ni, a ti bawk.

 

Lengpui Aiport hi Indian Air Force kuta a awm chuan, ram-venhimna (Security) chu ngaihpawimawh ber a ni nghal dawn a. Indona a lo thlen thulha hman tangkai turin awlai taka Jet-Fighter chet velna atan an chei bawl nghal dawn a (Eastern Region a AIRPORTS IAF hnuaia awm SILCHAR, TEZPUR, JORHAT leh CHHABUA,   BAGHDOGRA   leh   HASIMARA   ah   te   an  tih   tawh  ang   bawkin) tumhmun RUNWAY sir tuakah Indo thulh a Jet-Fighter thuhrukna tur (Concrete-Blast-Pen) siam a ni ang a, hei hian Civil Aircraft thlawhna lian A-320, A-321 etc. tum hmun a tizim ang a (directly violating ICAOA mandatory safety requirements) thlawhna lian (A-320 and above) chu anlo tum a thiang tawh lovang, MNF General Secretary chuan a ti.

Indona a lo thlen thulhah pawh IAF air-base lian chu hmelmate bitum (target) hmasak ber tur a nih dawn avangin, Lengpui khua mai nilovin Zoram mipuite tan a him lo hle dawn nia sawiin, Guwahati Airport pawh khu, tumhmun (RUNWAY) khawthlang lam zawng khu IAF Station, No. 19 Wing in a luah khat vek a. Concrete-a Blast-Pen pawh engnge maw zat chu siam a ni reng a. Hei vang hian ADANI GROUP a hlan anih dawn khan Future-Expansion/ Growth atan hmun a awm loh avangin RAM BIGHAS 364204.6 (90 Acres) lai, sum tam tak sengin ACQUIRE belh a ngaih phah reng a ni, a ti bawk.

Lengpui Airport ah hian nitin passenger lut leh chhuak sang chuang an awm ziah tawh a, NE Airports ah Passenger tam lamah 5-na kan ni a, Guwahati, Imphal, Agartala leh Dibrugarh dawtah Lengpui hi a awm mek a ni, a ti a.

“Airport upa zawk Silchar te, Tezpur leh Jorhat ang chi te pawh kan leh pel vek tawh a. Direct Flight pawh Delhi, Agartala leh Imphal-te kan nei a. Kan connection tam tawh zia atangin kan thang nasa hle tih a lang a, mipuite leh zirlai, pawn lama vahchhuah ngaiten an awlsam phah dante chhutin Zoram tan a hlu hle a. India ram chhung bakah ram dang khawpui Kathmandu, Dubai etc. atangte pawha thlawhna lo tum hun tur thlir tur kan nih laia, a ti chhe vek tur zawnga Air Force kutah ZPM sorkarin hlan mai a hnial dawn lo nia a lang hi a lungchhiatthlak takzet a ni,” a ti bawk.

“Ram hruaitu hmasaten, hma thlir (vision) tha tak nen a harsatna tinreng pal tlang tawh hnu  a Rs. 118.97 crore zet senga an lo “Survey, Constructed and Operationalised” kum 25 chuang Zoram mipuiin namen lova kan lo tangkaipui tawh hi, ZPM hruai tute hian a enkawl zuina tur sum takngial pawh an dil chhuak theilo anih chuan, a lungchhiat thlak takzet a ni. “Lengpui Airport” hi Mizoram pumpui ah “Single-Asset” kan neih zing a HLU-BER a ni tih hi i theihnghilh lovang u,” tiin a tarlang.

MNF Publicty Board  tarlan danin, Lengpui Airport hi a than chak avang leh a pawisa thawh chhuah pawh a pun zel avangin AAI-te nen pawh indawrna a lo awm tawh thin a, Mizoram tana ro hlu (Asset) hlu tak anih avangin midang kuta hlan chhawn dan turah Sorkar kal tawhten uluk takin ngaihtuahna an lo seng thin, an ti a.

AAI hotute leh Civil Aviation lam hotute pawh tum 16 zet an lo thukhawm tawh a, Mizoramin a hlawkpui tur leh Mizo mipuite pawhin an pawm tlan theih tur inremna a la awm thei lo, tiin.

AAI lamin inremna tur thuthlung MoU an rawn duan thar ber, 2022 draft ah khan Mizoram hlawk vena tur chu sawi loh Mizo mipuiten kan pawm theih miah loh tur thil engemawzat a inbilh tel avangin, MNF Sorkar khan uluk taka ngaihtuahna sengin, anih ang anga kaltlangpui chu a ni lo tih kha a ngaihdan a ni a, pawm tawn theih inremna thuthlung, Mizoram pawhin kan hlawkpui tur leh kan thatpui tur nei thei ila, AAI kutah emaw, Company kutah emaw hlan hi MNF chuan a dodal ngawt lo a. Kan Airport neih chhun ti chhe vek tur zawnga Indian Air Force kuta hlan tumna erawh a tawp thlenga dodal kan tum a ni” tiin tarlan a ni.